呢几日都好勤奋努力啊，因为之前因为忙班嘅嘢，几乎都冇做过任何作业啊。连续三日啦，只有时间就去自习，觉得自己就快要痴线啦。不过可以逃离下娱乐场般嘅宿舍，都几唔错嘅。嗰日同Sina去咗一次图书馆度之后，突然间觉得其实图书馆度自习都几唔错。于是乎今日上午下午都喺里边咬笔头啦。下午仲见到一个MM，坐喺我对面，简直就係鼻血鼻涕一齐流啊！

今晚去咗睇菲菲姐搞嘅Presentation大赛。讲真嘅，比赛搞得唔係太好。不过令我觉得好震撼嘅係参赛嘅各个小组都准备得好好，而且有一个小组嘅PPT整得超正，完全改变咗我对PPT嘅传统定义。而且有三四个小组嘅主题好有深度，令我觉得呢个Presentation大赛好有意义。其实之前就想学下CS，因为觉得好有用，而且可以娱乐下自己。而且我宜家最欠缺嘅係理论知识，突然间觉得自己唔应该放弃呢个机会啊。不过讲起又觉得火滚，本来宿舍参赛嘅，点知有两个人中途离弃我哋，跟住自己之前又忙到爆炸，剩低嘅人又不闻不问，睇电影，出去玩，到最后报名截止日期啦，连咩主题都未定。真係连闹佢哋嘅心情都冇啊。算啦，做好自己本分先算。

仲欠住火柴嘅嘢，不过如果要做得好，就一定要用到CS，逼下自己去学下嘢，都係一个好嘅过程。^_^

P.S.因为有超级重要嘅嘢，所以宜家谂紧下个星期点样逃课啊，边个大侠可以介绍下逃课嘅方法？

已经好耐冇更新啦，一直都冇时间。今个学期好多课啊，加上选修，有36节，7门专业课，真係黑暗啊。上个学期24节我都有啲力不从心啦，如果今个学期嘅课程一多作业，就香蕉啦。

上个学期真係过得好辛苦，俾老师误会，俾老师封杀，学费出问题，同欣欣分手，爱上另一个唔俾答复我嘅女仔，放唔低身上嘅荣誉，仲有学习压力。自己学习嘅效率太低啦，成日都集中唔到精神，经常要做作业做到凌晨两三点。不过最令我痛心嘅係自己嘅六级，又冇过，两次机会自己都冇把握，以为本科里边再冇机会考六级啦。曾经迷失咗一段时间，感觉跌咗入时间嘅漩涡里边，眼前嘅都係虚幻而抽象嘅影像。嗰种感觉真係好难受啊。

呢个学期一开始有喜又有悲，学校竟然俾一次机会我哋考四六级，好兴奋啊。虽然係考新六级，不过竟然上天再俾机会我，就肯定要考研下我嘎啦。点都好，几辛苦都要过，从宜家开始做起。呢个学期先啱啱一个月，不过自己已经算係好勤力啦，一有时间就去自习。作业又慢慢变多啦，唔通我哋专业一定要辅修“作业学”？

不过仲係有嘢令我安慰，上个学期考得唔错，全班第二名。成个资源排，我都有前十名啊。3.84嘅绩点，虽然未达到我嘅终极目标，不过係对我成绩方面付出嘅回报。其实我都觉得自己学得几好，如果考试嗰阵时可以细心啲，可能有更多惊喜？

寒假谂咗好耐，随住每一次嘅付出都得唔到答复，感情开始慢慢淡落去啦。终于决定咗啦，喺嗰日特别嘅日子里边，终于同佢讲我哋做番朋友啦。不过佢话想喺一齐，我嘅决定令佢觉得可惜。真係搞笑，唔通今次又係我做错咗决定？仲要有两三个朋友痛斥我，话我唔专一。究竟中意一个人几耐先唔算花心？究竟有冇人可以感受我嘅难受？我呢种人，唔通只适合做“榜样”？

谂起都笑啊。就咁唔开心咗几日。唔想番转头啦。其实到家阵，反而心平静、释怀咗好多。係咯，冇咩牵挂，而且有咗学习目标，应该可以全心全意完成心中嘅目标。终于加入咗广州青年志愿者，虽然宜家自己冇乜多余嘅时间，不过我真係想完成自己嘅一个心愿。

啱啱创红完毕，我地班挪咗第三。今次仲係我演讲，不过感觉上自己嘅表现比上年差咗，好似突出唔到自己嘅风格，畀唔到人哋震撼嘅冲击。而且令我觉得压抑嘅係，其他演讲者发生咗好大变化，有好大嘅进步，反衬下我就退步咗啦。而且我都有少少谂唔明啊，我哋从PPT制作，搞嘅活动，演讲方面都唔差，点解分数会同经地、地理差咁远嘅！睇嚟印象分好重要啊，某些专业以前好就永远都好，而某些专业就连翻身嘅机会都冇。

不过仲係好佩服自己嘅毅力，本身作业好多，又要开自己支部会议，参加其他支部通表，仲要将成副心机放落创红度，连续几日都係每日瞓四个几钟，太痴线啦。而且有个02级嘅师姐赞我表现得好好啊！^_^从呢段时间里边，可以见到更加多人嘅本质，有啲人把口讲到自己点样爱集体，点样无私奉献，一做嘢就大把借口。都係好开心同咁多人一齐合作。

最后想多谢Sina。一个偶然嘅机会，做咗我嘅妹。多谢呢段时间里边同我分享快乐。

 

P.S.今次嘅文章写咗好长时间啊，因为每次写咗少少，就有其他嘢咗啦。差唔多横跨咗半个月啊。而且係呢段时间里边，收到几条唔知边个发嘅短信，话多谢我要请我食饭，竟然仲有艳遇，真係莫名其妙啊！

今日番到屋企，先发觉屋企发生咗好多嘢。屋企人为咗我可以安心读书，一直瞒住我。其实自己又唔係唔知，只不过一直都唔上心。真係越来越觉得自己应该为屋企做啲嘢，廿几岁仔，要承担责任啦。越来越担心细佬，竟然又行番自己以前嘅路。唔想咁，成绩差可以接受，不过出嚟行就一定冇好结果。好想教好佢，不过如果佢自己唔识谂，讲咩都係冇用。

虽然几乎每次番屋企，我妈都会抱怨，不过唔番去会觉得更加对佢哋唔住。其实阿妈教我哋嘅方法係唔啱，不过我又讲唔明佢。细佬又好反叛，所以就经常火星撞地球。係佢哋之间好难揾到平衡点。

其实又唔係好坏，今日细佬都好主动问我英语问题。如果我畀多啲心机佢身上，因为会好多嘎。点都唔可以畀佢行入灰佬局。

都係要读好书，作为报答屋企嘅承诺！

    考完啦！！！

    既期待又慌张，不过点都好，呢个学期算告一段落，可以喺假期度调整下自己。考咗六科，感觉都唔算太差，最紧要係觉得呢个学期无白学。虽然成绩未必有预期中好，不过觉得自己学得算係扎实，原理同书嘅思路都好清晰。发觉自己嘅理科算係满意，要背嘅科目就痛苦啲啦。效果好似仲唔错，自己始终唔中意咁样考，好多人平时一啲课都唔听，临场背一背就好高分啦。呵呵，自己大二何尝唔係咁过？而且又讲得啱，背书的确係基础，脑里边冇积累，好多嘢都只係得个空壳。咁就勉为其难背下啦。

    唔会忘记以前讲过，呢个学年要成为神话！

    突然记番起佢讲嘅嘢，佢话相对于搞活动嚟讲，考试呢段时间係最轻松嘅。我都讲唔清，以前忙工作嗰阵时，就想用多啲时间去学习；宜家成个学期都为作业而要生要死挪刀拮大肶，反而觉得仲应该有少少。连我都唔清楚自己想要啲咩。船到桥头自然直，咁究竟我嘅船几时先望到桥？

    下个学期仲多课啊，而且好多都係工科，好担心点样可以应付。其实一时会觉得自己效率好低，咁辛苦都係咁嘅结果。又谂番起我宿舍嘅人，考试呢段时间夜夜笙歌，好似唔使考试咁。唉～～点解佢哋专业可以咁轻松。同人唔同命，同遮唔同柄！

    唉～～喺写嘢嘅时候，无意中见到佢嘅名，又震咗下。嗰条友，仲写错个字。点解连见到个名都咁，受不了啦。听日就出家，有幻想就DIY算啦。

    我要疯狂，我要爆发，我要发癫，我要痴咗线，我要成为神话，我要做番自己……

    考试啦，而且已经考咗四科啦。

    感觉唔算太差啦，毕竟已经尽咗自己努力啦。讲真，如果平时认真学下习，真係会学到嘢。只不过仲未发觉宜家学嘅嘢对以后嘅路有咩帮助。其实好多嘢都好难讲嘅，可能我以后会从事呢方面嘅工作。如果係咁嘅话，就痛苦啦。数学好难啊，学到头都大晒，每日都好似乌云密布，准备考运筹学同给排水工程啦，到嗰日一定会世界大战。

    又番到学校啦，番到嚟先发觉喺306嘅平静。又係嘅，虽然会睇书睇到头爆，不过始终唔使谂咁多多余嘅嘢……竟然觉得多余啦，可能呢条路只会係冇结果，不过又揾唔到借口去放弃。

    好似又越嚟越远啦……

    前几晚三条麻甩佬去食消夜，一抬头，竟然见到佢。心脏刹那间就好似俾样嘢大力敲击咗一下咁，就要跌出嚟啦。显然係忘记唔到。求你啦，唔好咁折磨我啦，答应我啦～～～

    大学里边有两个梦未圆，一个係好好学习，宜家已经尽自己努力去实现啦，不过唔清楚最后嘅结果会点。另一个係做义工。希望下个学期可以入到“灯塔”，喺里边长期工作。如果以后可以争取到短期嘅义教计划，咁就好好啦。前几我终于写咗邮件俾中心小学嘅校长啦，好期待佢嘅回信，都好挂住张宝元同许惠香。呵呵呵呵～～

    发觉应承咗人某些嘢，仲未实现啊。呢个假期点都唔可以再亏欠啦。

    Eason一首好悲伤嘅新歌，亦都係我呢排成日听嘅……

 

    “头沾湿无可避免
       伦敦总依恋雨点
       乘早机忍耐着呵欠
       完全为见你一面
       寻得到尘封小店
       回不到相恋那天
       灵气大概早被污染
       谁为了生活不变
       越渴望见面然后发现
       中间隔着那十年
       我想见的笑脸只有怀念
       不懂怎去再聊天
       像我在往日还未抽烟
       不知你怎么变迁
       似等了一百年忽已明白
       即使再见面
       成熟地表演
       不如不见”

        真係好火滚，呢个决定係我呢个学期听到嘅最另人恶心嘅嘢，呢个解释亦都我呢个学期我觉得最荒谬嘅借口！

        唔通做每一件事都要咁实际，都要从赤裸裸嘅利益关系出发？

        唔通就冇谂过做决定时要对自己嘅学生负责，对人哋真诚嘅心负责？

 

        嗰日嘉慧话我好傻，应该要变一下。我只係觉得我傻得有道理！

        唔通我以后步入社会都要做一个连自己都唔想接受嘅“社会分子”？

    时间过得好快啊，谂唔到又番到嚟啦，喺一个冇人估到嘅地方度静静咁写日志。好多感觉又涌番上嚟。

    考试嗰段时间其实已经好投入噶啦，不过伤感嘅感觉总係挥之不去。睇住人哋嘅签名里边一直喺度进行回迁倒计时，先发觉时间已经唔多啦。雁行送旧联欢嗰日完咗之后瞓喺“烟灰缸”度，望住大家，望住学校……真係好舍唔得啊！而我更加唔舍得雁行嘅一切。虽然我喺雁行只係一年，不过我哋嘅感情实在太深啦，我大学几乎最开心，最痛苦，最忙，最冇厘头嘅日子都喺雁行度过，而我又得到大家嘅认同，所以喺雁行里边实在好开心啊。其实每一年都有好多人离开珠海校区，只不过自己冇用心去留意，觉得冇咩特别，宜家到自己要走啦，先终于发觉离别嘅情感会好浓，浓到总觉得自己一直喺一个虚幻嘅世界里边咁，好唔真实。其实都係自己呃自己啫。

    第二日就要去实习啦，虽然宿舍乱到爆，自己又咩都未执，不过宜家只係想瞓喺到谂野。突然觉得我哋好惨，啱考完试就去实习，实完习番嚟就回迁啦。连怀念、细味离愁嘅时间都冇。所以好羡慕喺榕园广场嗰啲醉到要五六个人先扶得稳嘅同学，坐喺凳上倾计嘅一对对，喺宿舍楼下喊到天昏地暗嘅一堆堆人。我都想有人分享我嘅感觉，或者俾我暂时逃避一下现实……

    如果我哋四年都係同一个地方，会唔会冇咁多伤感嘅情况出现？呢个想法吓咗我一跳，如果係咁，到我大四毕业嗰阵时就可能更加痛苦啦……唉~~~真係矛盾……

    走嗰日好开心，因为好多人嚟送我啊，而且仲收到一支花。其实我好惊星星老师会忍唔住啊，因为我都係一个咁样嘅人。车走啦，当大家都离开我视线嗰阵时，眼泪就好自然咁占据咗眼睛。始终都忍唔住，点解始终要用自己嘅眼泪去证明呢个事实嘅存在？

    可惜仲有一个遗憾啊……

    PS.呢排好中意听嘅歌：

      如果宁静中感到害怕
      送我相拥有用吗
      会为我添上顾虑吗

      可安心吗
      平静的海仍充满热情暗浪
      虽安身这个怀里亦怕

    其实谂唔到自己学习都可以咁疯狂，竟可以从朝早到晚黑都喺度对住同一本书。不过呢个都係冇办法，选咗呢条路，就只可以接受呢条路嘅险阻同结果。

    本来上个星期仲觉得自己有希望嘅，不过到咗呢个星期先发觉係自己太安逸啦，冇晒危机感。考试接近啦，先发觉原来自己係唔够时间嘅。咁又係，只用4日去自学一本一百七十几页嘅数学书，用两日嘅时间去重新学两本专业课嘅书，又边有咁嘅可能。有人话我好幸福，因为每一科都有时间复习。唉～～如果我喺度复习就好咯，宜家係重新学过，又边会觉得幸福。

    真係好苦恼啊，唔想就咁俾时间去宣布我嘅失败。不过现实方面自己又唔够能力去改变呢个结果。想就咁放弃，不过又唔甘心。本来觉得自己可以创造神话，不过宜家真係要笑下自己啦，如果可以考得好，咁就真係神话啦。

   一定唔可以肥佬嘎！

（PS. 前几日已经係第四个人咁样讲我啦，谂唔到，唔单止连自己呃唔到，连身边嘅人都瞒唔过）

    身体唔舒服，好头痛啊！

    真係一塌糊涂啊！咩嘢都俾我搞到乱糟糟咁，冇晒条理。

    表彰大会嘅场地不停咁改，改唔係一个问题，咁都要听下我哋意见嘎。寻日去睇伍舜德嘅场地，虽然已经去过，不过去到一睇，都係接受唔到。你话喺度搞个讲座或者论坛係好Perfect，不过宜家係晚会喔，嗰个场地边可以嘎。不过睇啲老师係咁赞地方如何之好，如何之冇得顶，我都知我再提意见都係冇用嘎啦。惯啦，无论领导嘅决定几无理，我哋都係只可以跟住做。所以我都唔讲嘢啦，你哋想点就点咯。小喇叭，如果係咁，当初就唔好话搞晚会啦，本来风格就唔协调。话搞，又Hand得咁紧，有閪用啊！特别嗰个江症雨，做嘢拖拉，完全可以唔顾我哋感受同意见，成日俾个锅我哋孭，扑你个臭街！算啦，我呢种咁唔成熟嘅人係唔可以理解领导嘅决策嘎啦。

    小白，辛苦你啦！夹喺中间做人难啊！

    前日心情极度之差，值完班番到宿舍，发觉电脑罢工。突然间觉得其实都唔係坏事，起码我哋宿舍嘅第五人唔会一直占住我电脑啦。跟住去初审节目，本来好好哋，就算要我上去跳咗嗰个舞，出个丑都冇所谓。点知某个老师最后又要话啲节目咁改，又要咁串。我知，你係要个晚会好，咁都要考虑下可操作性问题先得嘎，你呢啲咁嘅要求做到我哋呕血都完成唔到啦。而且人哋又点可以接受咁嘅改法。我又唔想讲嘢啦，因为发觉我再讲落去又讲错嘢嘎啦。跟住燕玲因为其他嘅嘢而喊到咩咁，我好心痛！其实我已经觉得自己身心疲惫，好想放弃嘎啦，不过我咁辛苦都唔可以分担身边人嘅痛苦，咁又有咩用！燕玲做我哋嘅教练，肯定好大压力嘎啦，而且佢为咗雁行已经放弃咗好多嘢，如果咁仲得唔到肯定，实在唔公平啊！

    对唔住啊，我哋都冇跳舞天分，辛苦你啦！

    寻日见到菲菲姐，唔知发生咗咩事，喺佢面前胡言乱语，九唔搭八，乱七八糟。算啦，呢排都係咁嘎啦！不过谂起呢个星期又冇时间去做作业，真係心烦啊！唔理点都好，一定要坚持学习啊！

    如果当你睡眠不足，而且从朝早8点值班一直到下午2点，你会点？

    我想爆粗啊～～～～～～～

    点解咁邪嘅，雁行社唔见咗钥匙，竟然同我有间接嘅关系。成晚都瞓唔着，如果学工办唔见咗嘢，我十条命都唔够赔啦。边条粉肠挪咗钥匙又唔讲，如果畀我知道咗，我一定要佢赔番啲瞓觉时间畀我。

    又开始恶性循环啦，开会瞓唔好觉挂住睇动画片上课瞓觉疯狂赶作业开会瞓唔好觉挂住睇动画片上课瞓觉疯狂赶作业开会瞓唔好觉挂住睇动画片上课瞓觉疯狂赶作业开会瞓唔好觉挂住睇动画片上课瞓觉疯狂赶作业……

    唔通我同周公有缘无分……

    我要瞓觉、瞓觉、瞓瞓觉、瞓觉、瞓、瞓觉、瞓觉、瞓觉、瞓、觉、瞓觉、瞓觉、觉、瞓觉、瞓觉、觉、瞓觉、瞓瞓觉、瞓觉、瞓觉、瞓、觉、瞓觉……